د لومړي ځل لپاره د اوریدنې او لید معلولیت لرونکو زده کوونکو لپاره ځانګړې کانکور ازموینه ترسره شوه
د تخنیکي او مسلکي زده کړو ادارې د ازموینو عمومي ادارې په همکارۍ، د لومړي ځل لپاره د تخنیکي او مسلکي زده کړو ادارې د ځانګړو زدهکړو مرکزونو د زدهکوونکو لپاره ځانګړې کانکور ازموینه ترسره کړه.
په دې پروګرام کې د هېواد له بېلابېلو ولایتونو څخه نږدې ۱۲۰ تنه د اورېدنې او لید معلولیت لرونکو زدهکوونکو ګډون کړی و.
د تخنیکي او مسلکي زده کړو ادارې مسؤلین وايي، چې دا د علم او پوهې د ملاتړ په برخه کې د اسلامي نظام لپاره یوه ستره لاسته راوړنه ده، چې د افغانستان د کانکور په تاریخ کې یې بېلګه نه ده لیدل شوې.
د تخنیکي او مسلکي زده کړو ادارې رئیس الحاج مولوي غلام حیدر شهامت د ځانګړې کانکور ازموینې له ګډونوالو سره په لیدنه کې وویل، چې د افغانستان اسلامي امارت ژمن دی، څو د ټولنې ټولو قشرونو ته ګټور خدمات وړاندې کړي.
محترم مولوي صاحب شهامت د دې پروګرام د ترسره کولو په برخه کې د لوړو زدهکړو وزارت او ازموینو عمومي ادارې له همکارۍ څخه مننه او قدرداني وکړه.
بلخوا، د تخنیکي او مسلکي زده کړو ادارې د زدهکوونکو او محصلینو چارو رئیس استاد رفیعالله حبیبي د دې ادارې د ځانګړو زدهکړو مرکزونو په اړه معلومات وړاندې کړل.
نوموړي زیاته کړه، چې د نورو مسؤلیتونو ترڅنګ، په هېواد کې د اورېدنې او لید معلولیت لرونکو کسانو لپاره د ځانګړو زدهکړو د زمینې برابرول د تخنیکي او مسلکي زده کړو ادارې له اساسي دندو څخه دي.
هغه وویل، چې په تېرو پنځو کلونو کې په هېواد کې د ځانګړو زدهکړو مرکزونه له ۱۶ مرکزونو څخه ۳۶ مرکزونو ته پراخ شوي دي.
په همدې حال کې، د ازموینو عمومي ادارې، اداري او تخنیکي مرستیال شیخ رحیمالله حقاني او د لوړو زدهکړو وزارت علمي معین محترم ضیاءالرحمن آریوبي د اورېدنې او لید معلولیت لرونکو کسانو لپاره د زدهکړو د زمینې برابرولو په برخه کې د تخنیکي او مسلکي زده کړو ادارې له هڅو څخه قدرداني او مننه وکړه.
د لوړو زدهکړو وزارت او د ازموینو عمومي ادارې هم له تخنیکي او مسلکي زده کړو ادارې سره د همکاریو د پراختیا او پیاوړتیا په اړه خپله ژمنتیا څرګنده کړه.
د یادونې وړ ده، چې د ځانګړې کانکور ازموینې ګډونوالو د دې پروګرام د ترسره کېدو له امله خپله مننه او خوښي څرګنده کړه. هغوی وویل، چې په کانکور ازموینه کې ګډون د دوی له هیلو څخه و او د دغې هیلې پوره کېدل ورته د ډېرې خوښۍ وړ دي.
