د کشک رباط سنګي ولسوالۍ له مشرانو سره د تخنیکي او مسلکي زده کړو ادارې د پلاوي ناسته

ښاغلي الحاج مولوي غلام حیدر شهامت او ورسره مل پلاوي، په هرات ولایت کې د کشک رباط سنګي ولسوالۍ له مشرانو سره غونډه ترسره کړه.

دغه غونډه د هرات ولایت د کشک رباط سنګي په ولسوالۍ کې د زده کړې یو مرکز جوړولو لپاره، د محلي چارواکو او مشرانو سره د سلا مشورې په موخه جوړه شوه، په دغه ناسته کې د یاد مرکز د جوړېدو په څرنګوالي بحث وشو.

د تخنیکي او مسلکي زده کړو ادارې سرپرست په یاده ولسوالۍ کې د تخنیکي او مسلکي زده کړو مرکزونو وضعیت ته په اشارې سره وویل چې د هرات ولایت کشک رباط سنګي ولسوالۍ کې د یو انستیتوت جوړول اړین دي.

همدارنګه، د سیمې مشرانو د تخنیکي او مسلکي زده کړو ادارې د انستیتوت جوړولو په هکله د رهبرۍ د تصمیم ستاینه وکړه او انستیتوت ته د مناسب ځای او ځمکې برابرولو وعده یې وکړه.

د تخنیکي او مسلکی زده کړو ادارې یو پلاوی د یادې ادارې د سرپرست، ښاغلي مولوي غلام حیدر شهامت په مشرۍ د تخنیکي او مسلکي زده کړو مرکزونو د وضعیت څېړلو په موخه ولایاتو ته سفر کړی دی.

د دغه سفر موخه، په ولایتونو کې د تخنیکي او مسلکي زده کړو مرکزونو ستونزو ته حل لاراو د ضرورتونو پوره کول عنوان شوي دي.