د تخنیکي او مسلکي زده کړو ملي ادارې تخنیک ټيم د یو لړ مراسمو په ترڅ کې وستایل شو
د تخنيکي او مسلکي زده کړو ادارې اړوند يوه ټیم چې د چين هیواد د کمربند او لارې په نړيواله سيالۍ کې یې ګډون کړی و، د تخنیکي او مسلکي زده کړو ملي ادارې د مشرتابه لخوا وستایل شول.
نوموړو په نړیوالو سیالیو کې د افغانستان په استازیتوب ګډون درلود او وتوانیدل چې د روباټیک په برخه کې د ۶۱ بیلابیلوهېوادونو تر منځ د سیالیو په ترڅ کې څلورم مقام خپل کړي.
همدارنګه یاد ټيم د زرګرۍ په برخه د کمربند او لارې په نړیوالو سیالیو کې هم پنځم مقام خپل کړی.
د دې ترڅنګ ، د کمربند او لارې د سیالۍ تنظیم کونکو د تخنیکي او مسلکي زده کړو ادارې یو تن استاد د سیالۍ لپاره د نړیوال دوار ( څارونکي ) په توګه هم وټاکه.
د تخنيکي او مسلکي زده کړو ملي ادارې سرپرست الحاج مولوي غلام حيدر شهامت د تخنیک ټيم د ستاینې په مراسمو کې وویل؛ چې دغه لاسته راوړنه د افغانستان غیور ولس لپاره ډېره ښه او مبارکه لاسته راوړنه ده.
ښاغلي مولوي شهامت وویل، د تخنیکي او مسلکي زده کړو اداره هڅه کوي چې د تخنیکي او مسلکي زده کړو په برخه کې د ځوانانو د ودې او پرمختګ لپاره لا زیات مناسب شرایط رامنځته کړي.
په همدې حال کې د تخنيکي او مسلکي زده کړو د ټيم په استازيتوب استاد زکريا عمري او استاد فريدون بختياري د کمربند او لارې د نړيوالې سيالۍ د ترسره کیدو د څرنګوالي په اړه توضیحات وړاندې کړل.
استاد عمري څرګنده کړه چې په دې سياليو کې د نوموړو ګډون بېلابېلې لاسته راوړنې درلودې. هغه زياته کړه، چې د څلورم مقام د ګټلو ترڅنګ يې نور مهارتونه هم زده کړي دي.
نوموړو استادانو زیاته کړه، که د تخنيکي او مسلکي زده کړو ادارې د زده کوونکو او ښوونکو لپاره زياتې اسانتياوې برابرې شي؛ دوی کولی شي ډیر څه ترلاسه کړي او نورو ډيرو لاسته راوړنو ته هم لاسرسي ومومي.
د پروګرام په پای کې ښاغلي مولوي غلام حیدر شهامت د خبریالانو پوښتنو ته هم ځوابونه وویل.
نوموړي دغه راز زياته کړه، چې په نړيوالو سياليو کې به د تخنيکي او مسلکي زده کړو ادارې د ښوونکو او زده کوونکو د ګډون د ودې او اسانتيا په برخه کې هېڅ ډول هڅې ونه سپموي.
