په هرات ولایت کې د تخنیکي او مسلکي زده کړو مرکزي لیلیې د بیارغونې او ترمیم پروژه افتتاح شوه
د هرات ولایت د تخنیکي او مسلکي زده کړو مرکزي لیلیې د ودانۍ د بیارغونې او ترمیم پروژه، چې څه موده وړاندې د لویدیځ زون د تخنیکي او مسلکي زده کړو ریاست لخوا د ترکیې هیواد «ټیکا» مؤسسې په همکارۍ پیل شوې وه، افتتاح شوه.
ددې پروژې د افتتاح کیدو په مناسبت جوړ شویو مراسمو کې د لویدیځ زون د تخنیکي او مسلکي زده کړو رئیس مولوي ملتان ذاکر، د ټیکا دفتر مشر عرفات ډینیز او د هرات ولایت د تخنیکي زده کړو آمریت یو شمیر مسؤلینو، استادانو او زده کونکو هم ګډون درلود.
د لویدیځ زون د تخنیکي او مسلکي زده کړو رئیس په مراسمو کې د وینا پر مهال، د تخنیکي او مسلکي زده کړو مرکزونو زده کونکو لپاره د غوره ښوونیز فرصتونو په برابرولو کې د ترکیې هیواد «ټیکا» مؤسسې له هر اړخیزو همکاریو څخه قدرداني وکړه.
په ورته وخت کې، د تیکا مؤسسې مشر عرفات ډینیز د پروژې له پرمختګ څخه خوښي څرګنده کړه او ژمنه یې وکړه چې تیکا بنسټ به په افغانستان کې د ښوونیزو زیربناو په پراختیا کې د تخنیکي او مسلکي زده کړو له ادارې سره هر اړخیزو همکاریو ته دوام ورکړي.
د یادونې وړ ده چې په دې پروژه کې د لیلیې بیارغونه، د اودس خونه، د طعام خونې جوړول، د «پی وی سی» کړکیو نصبول او نور اړوند موارد شامل دي، چې د یوې میاشتې په اوږدو کې یې کار بشپړ او ګټې اخیستنې ته چمتو شوې ده.
