د تخنیکي او مسلکي زده کړو ملي ادارې د سرپرست او د لوړو زده کړو د وزیر ترمنځ دوه اړخیزه ناسته تر سره شوه
د تخنیکي او مسلکي زده کړو ملي ادارې سرپرست الحاج مولوي غلام حیدر شهامت د هیواد د لوړو زده کړو له وزیر محترم شیخ ندا محمد ندیم سره دوه اړخیزه ناسته ترسره کړه.
د دې غونډې محور؛ د دواړو بنسټونو ترمنځ د ګډو همکاریو او د تجربیاتو تبادله ویل شوې ده.
په همدې حال کې د تخنیکي او مسلکي زده کړو ادارې سرپرست د یادې ادارې د پروګرامونو په اړه توضیحات ورکړل او دواړو لورو په بېلابېلو نورو موضوعاتو او د ګډو همکاریو پر څرنګوالي خبرې وکړې.
په دې کتنه کې د تفاهملیک پر بنسټ د ظرفیت لوړونې، نصاب او علمي څېړنو په برخه کې د همکاریو پر پیل هوکړه وشوه.
له بلې خوا د لوړو زده کړو وزیر ژمنه وکړه چې د تخنیکي او مسلکي زده کړو د مرکزونو استادان او فارغان به له یوې اختصاصي ازموینې وروسته د ماسټرۍ او دوکتورا په دورو کې د شاملیدو لپاره د هېواد په پوهنتونونو کې شامل شي.
همدارنګه په دې کتنه کې دواړو لورو ټینګار وکړ چې په هېواد کې د علومو پرمختګ د تعلیمي او تحصیلي بنسټونو ترمنځ همغږي ته اړتیا لري او دا همغږي باید نوره هم پیاوړې شي.
له بلی خوا په دې غونډه کې د تخنیکي او مسلکي زده کړو ادارې او د لوړو زده کړو وزارت ترمنځ په نړیوالو علمي پروګرامونو کې د ګډون، د ګډو علمي نندارتونونو د جوړولو او د تجربیاتو د تبادلې پر څرنګوالي هم خبرې وشوې.
دواړو خواوو هوکړه وکړه چې په هېواد کې د علومو د ودې او پرمختګ لپاره د علمي بنسټونو ترمنځ یادې ناستې باید دوام وکړي او د ګډ تفاهملیک پر بنسټ به همکارۍ پر مخ یوړل شي.
