په فراه ولایت کې د تخنیکي او مسلکي زده کړو ادارې له لوري د کډوالو لپاره لنډمهاله حرفوي پروګرام پیل شو
په فراه ولایت کې د تخنیکي او مسلکي زده کړو ادارې مسؤلین خبر ورکوي چې د یاد ولایت په بالابلوک ولسوالۍ کې یې د کډوالو لپاره د موټرسایکل رغونې «ترمیم» لنډمهاله درې میاشتنی روزنیز حرفوي پروګرام پیل کړی.
د دې پروګرام په پرانیست غونډه کې ویناوالو له ګډونوالو وغوښتل چې د یاد پروګرام په اهمیت پوه شي او له دې پروګرام څخه په سمه توګه ګټه پورته کړي.
په ورته وخت کې، ګډونوالو هم ددې روزنیز پروګرام د ترسره کیدو څخه خوښي څرګنده کړه او همداراز د ټولنې بیلابیلو قشرونو ته د کاري فرصتونو په رامینځته کولو کې د تخنیکي او مسلکي زده کړو ادارې د دغه اقدام څخه ستاینه وکړه.
لنډ مهاله حرفوي پروګرامونه د تخنیکي او مسلکي زده کړو ادارې له اساسي پروګرامونو څخه ګڼل کېږي، دغه پروګرامونه په هیواد کې د اشتغال زايي او د بې وزلۍ د کمولو په موخه ترسره کیږي.
