د کنړ د ادارې او حسابدارۍ انسټيټوټ څخه نږدې ۷۰ تنه محصلین فارغ شول
د کنړ ولایت د ادارې او حسابدارۍ له انسټیټوټ څخه څه باندې ۷۰ تنو د فراغت مراسم د یاد ولایت یو شمېر سیمه ییزو چارواکو په حضور کې ترسره شول.
په دغې مراسمو کې د ولایت مقام مرستیال والي مولوي عبدالله حقاني ترڅنګ؛ د نورو ملکي او نظامي ادارو استازو هم حضور درلود.
مولوي حقاني په دغې برنامه کې د خپلو خبرو په ترڅ کې محصلينو ته د فراغت مبارکي وويله او زياته يې کړه چې حکومت د هېواد پرمختګ او سوکالۍ ته ژمن دى او په دې برخه کې هڅې روانې دي.
په ورته وخت کې د کنړ تخنیکي آمر مولوي شاکرالله الکوزي په هېواد کې د تخنیکي او مسلکي زده کړو پر ارزښت خبرې وکړې او د ځوانانو د روزلو په برخه کې یې د تخنیکي او مسلکي زده کړو د مرکزونو استادانو او کارکوونکو هڅې وستایلې.
نورو ويناوالو هم په هېواد کې د تخنيکي او مسلکي زده کړو اهمیت په اړه خبرې وکړې او د دغو زده کړو په لا زيات ملاتړ يې ټينګار وکړ.
غونډه فارغانو ته د تصدیق پاڼو په ورکولو سره پای ته ورسیده.
