د «محمود راقی» مرکز کثیرالرشتوي انسټیټوټ محصلینو ته د نباتاتو دوا شیندلو په اړه روزنه ورکړل شوه
د کاپیسا ولایت اړوند «محمود راقی» مرکز کثیرالرشتوي انسټیټوټ د کرنې څانګې محصلینو ته د تخنیکي او مسلکي زده کړو ادارې ښوونیزو مرکزونو د عملي زده کړو په چوکاټ او د یو علمي سفر په ترڅ کې د نباتاتو د درمل شیندلو د څرنګوالي په اړه روزنه ورکړل شوه.
د دې عملي سفر په ترڅ کې، لارښود استاد محصلینو ته د نباتي ناروغیو د درملنې لکه شپشک او د دوا شیندلو د څرنګوالي په اړه مفصل توضیحات وړاندې کړل.
دغه راز د درس په دوام کې، محصلینو هم په دې برخه کې خپلې پوښتنې او سوالونه له لارښود استاد سره شریکې کړې چې د هغوی پوښتنو ته د استاد له لوري جامع ځوابونه هم ورکړل شول.
د تخنیکي او مسلکي زده کړو په مرکزونو کې د زده کړو لویه برخه عملي ده، له همدې امله د تخنیکي او مسلکي زده کړو مرکزونو فارغان د فراغت وروسته په مستقیم ډول د کار بازار ته جذب کیږي.
