د تخنیکي او مسلکي زده کړو ادارې د مشرتابه پلاوي غونډه د دغه ادارې د بودجې د ویش په اړه ترسره شوه
د تخنيکي او مسلکي زده کړو ادارې د مشرتابه پلاوي غونډه د دغه ادارې د سرپرست مولوي غلام حيدر شهامت په مشرۍ او د دغه ادارې د مرستيالانو په حضور کې ترسره شوه.
په دغه غونډه کې د تخنیکي او مسلکي زده کړو ادارې د ۱۴۰۲ مالي کال د بودجې د ویش په اړه بحث وشو.
په پیل کې د بودجې آمر عبدالحمید وهاب د تخنیکي او مسلکي زده کړو ادارې د منظورې شوې بودجې په اړه خبرې وکړې او ویې ویل، چې د دغه ادارې ټوله بودجه څه باندې یو میلیارد ۳۸۲ میلیونه افغانۍ ده.
ښاغلي وهاب د ټولو بودجوي کوډونو بودجه تشریح کړه او د غونډې برخه والو په دغه برخه کې خپل نظرونه او وړاندیزونه شریک کړل.
د تخنيکي او مسلکي زده کړو ادارې سرپرست په ولايتونو کې د زده کړیالانو د بدل اعاشې لپاره د بودجې پر جدي څارنې ټينګار وکړ.
ښاغلي شهامت لارښوونه وکړه، چې د بودجې د سپما په موخه دې ولایتي سفرونه محدود او د ښوونیزو توکو د چمتو کولو لپاره دې کافي بودجه په پام کې ونیول شي.
د بودجې د ویش په نورو مواردو کې لازم تصمیمونه ونیول شول او غونډه د دعا په ویلو سره پای ته ورسیده.
