د هرات ولایت د کرنې او وترنرۍ انسټیټوټ د زده کوونکو له لوري د عملي فعالیتونو لړۍ
د هرات ولایت د کرنې او وترنرۍ انسټیټوټ د دولسم ټولګي زده کوونکو د دې ښوونیز مرکز په څېړنیز فارم کې د "سبزیجاتو او میوو تولید" مضمون تر چوکاټ اړوند عملي فعالیتونه ترسره کړل.
نوموړو په دې درسي جلسه کې د رومي باندنجانو، بادرنګ او مرچ د کښت او کرنې د څرنګوالي په شمول د بیلابیلو موضوعاتو په اړه په عملي شکل روزنه ترلاسه کړه.
همداراز زده کوونکو هم د ډله ایزو فعالیتونو په ترسره کولو سره د یادو سبزیجاتو د کښت او کرنې څرنګوالی به عملي او دقیق ډول زده کړ او دغه راز خپلې پوښتنې یې هم له استاد سره شریکې کړې.
د دې عملي فعالیتونو په دوام کې، لارښود استاد زده کوونکو ته د بادرنګ، مرچو او رومي باندنجانو د اهمیت او ارزښت په اړه مفصل توضیحات وړاندې کړل او د هغوی پوښتنو ته یې په دې برخه کې ځوابونه وویل.
د باکیفیته کرنیزو محصولاتو د تولید اهمیت او ارزښت ته په پام سره، دا فعالیتونه د هیواد په کرنیز سکتور کې د ماهر او متخصصو انساني سرچینو په روزنه کې مهم او ارزښتناک رول لوبوي.
له همدې امله، د تخنیکي او مسلکي زده کړو ادارې رهبري تل هڅه کوي ترڅو د تخنیکي او مسلکي زده کړو په مرکزونو کې د عملي زده کړو لړۍ نوره هم پیاوړې کړي.
