د بلخ ولایت اړوند اداره او حسابدارۍ انسټيټوټ د محصلینو فراغت غونډه ترسره شوه
د بلخ ولايت اړوند ادارې او حسابدارۍ انسټيټوټ څخه د یو شمیر محصلينو د فراغت په پار د یاد تخنیکي مرکز لخوا، فراغت غونډه ترسره شوه.
په دې مراسمو کې د بلخ د تخنیکي او مسلکي زده کړو آمریت مسوولینو، سیمه ییزو چارواکو، قومي مشرانو، مخورو او د فارغ شویو محصلینو د کورنیو غړو هم برخه اخیستې وه.
د بلخ ولایت د تخنیکي او مسلکي زده کړو آمر مولوی نورالله "صلاحالدین" امینی په دې مراسمو کې محصلینو ته د مبارکۍ ورکولو ترڅنګ زیاته کړه چې ځوانان د ټولنې د ملا د تیر حیثیت لري او هفوی باید د ځان بسیاینې او د ټولنې د اصلاح کولو لپاره له خپل بشپړ توان څخه کار واخلي.
نوموړي همدارنګه ټینګار وکړ چې هیواد ژمن، مسلکي او ایمانداره ځوانانو ته اړتیا لري او د افغانستان لپاره د روښانه راتلونکي د جوړولو په برخه کې د تخنیکي او مسلکي محصلینو رول مهم او ارزښتناک دی.
د غونډې په پای کې فارغ شويو محصلینو ته ستاینلیکونه ورکړل شول او مراسم په دعایې سره پای ته ورسیدل.
