د تخنیکي او مسلکي زده کړو ادارې، مالي او اداري مرستیال د کندز ولایت له مقام سره ناسته ترسره کړه
د تخنیکي او مسلکي زده کړو ادارې د مالي او اداري چارو مرستیال ښاغلي مفتي فضل الرحمن فاضل په مشرۍ یوه پلاوي د کندز ولایت له مقام سره ناسته ترسره کړه.
په دې ناسته کې، د زون په کچه د تخنیکي او مسلکي زده کړو ریاست د فعالولو د څرنګوالي په شمول پر بیلابیلو موضوعاتو بحث او د نظریاتو تبادله وشوه.
د یادونې وړ ده چې په دې وروستیو کې د ا.ا.ا د هیواد د زونونو په کچه د تخنیکي او مسلکي زده کړو ریاستونو د منظورۍ امر صادر کړی.
د زون په کچه د تخنیکي او مسلکي زده کړو ریاست جوړول او فعالیدل کولی شي د نږدې ولایتونو ترمنځ د ښه همغږۍ لپاره زمینه چمتو کړي او په ولایتونو کې د ښوونیزو پروګرامونو په اغیزمن مدیریت کې مرسته وکړي.
