د فارياب ولايت قيصار ولسوالۍ د کرنې او وترنرۍ انسټیټوټ د زده کړیالانو ترمنځ سيالي ترسره شوه
د قیصار کرنې او وترنري انسټیټوټ زده کړیالانو د اناتومي او هسټولوژي په برخه کې د وترنري څانګې د ۱۳ (الف) او دیارلسم (ب) ټولګیو ترمنځ د علمي او مسلکي پوهې د کچې د لوړولو په موخه د تحصیلي سیالۍ پروګرام ترسره شو.
د دغه رقابتي ښوونيز پروګرام تنظيموونکو استادانو وويل، چې د دې پروګرام موخه د زده کوونکو د پوهې د کچې لوړول، د هڅونې او سالمې علمي سيالۍ رامنځته کول دي.
د قيصار ولسوالۍ کرنې او وترنري انسټیټوټ امر استاد محمد تيمور رنجور وويل، چې دا په 1401 کال کې لومړنۍ تعليمي سيالۍ دي او د قيصار کرنې او وترنرۍ انسټیټوټ په پام کې لري، د فاریاب ولایت په کچه په راتلونکي کې هم د تخنيکي زده کړو په مرکزونو کې د زده کړیالانو ترمنځ په نورو موضوعاتو کې ورته سيالۍ هم په لاره واچوي.
دغه راز په دغه پروګرام کې ګډون کوونکو زده کړیالانو د دغه ډول علمي سیالیو جوړول د زده کړیالانو د استعداد او وړتيا په لوړولو کې ګټور وبلل او د دغه شان پروګرامونو د دوام غوښتنه يې وکړه.
د پروګرام په پای کې د دې انسټیټوټ زده کړیالانو ترمنځ د سیالۍ پایله په مساوي نمرو سره اعلان شوه.
