د اکاډمیکو چارو مرستیال د پروان او کاپیسا ولایتونو د تخنیکي او مسلکي زده کړو له مرکزونو څخه لیدنه وکړه
د تخنیکي او مسلکي زده کړو ادارې اکاډمیکو چارو مرستیال استاد نورمحمد عزیزي دوه ورځني سفر په ترڅ کې پروان او کاپیسا ولایتونو له انسټیټونو او مسلکي ښوونځیو څخه لیدنه وکړه.
په دغه سفر کې له ښاغلي عزیزي سره د نصاب او ښوونکو د روزنې رئیس عصمت الله منیر او څارنې او ارزونې رئیس لعل پادشاه فقیرزاده ملتیا کوله.
د اکاډمیکو چارو مرستیال د دغه سفر موخه د پروان او کاپیسا ولایتونو د تخنیکي او مسلکي زده کړو مرکزونو د ښوونکو او زده کوونکو د ستونزو څېړل او د ازموینو بهیر څخه څارنه وه.
همدا راز ښاغلي عزیزي د دغه سفر په ترڅ کې د پروان له والي ښاغلی مولوی عبیدالله امین زاده او د دغه ولایت د پوهنې له رئیس ښاغلی مفتی محمد حسن حقانی سره وکتل.
په دې کتنه کې دواړو لورو د تخنیکي او مسلکي زده کړو د مرکزونو او د پوهنې ترمنځ د همکارۍ او همغږۍ په اړه خبرې وکړې.
د پوهنې رئیس ښاغلي مفتي محمد حسن حقاني ژمنه وکړه، چې د تخنیکي او مسلکي زده کړو مرکزونو د زده کړیالانو لپاره به د پوهنی وسایلو او لابراتوارونو د استفادې زمینه برابره کړي.
د تخنيکي او مسلکي زده کړو ادارې د اکاډمیکو چارو مرستيال دغه ولايت ته د دغه سفر په ترڅ کې د کاپيسا له مرستيال والي ښاغلي مولوي اسدالله سنان سره هم ليدلي او ورسره یی خبرې اترې کړې دي.
په دې کتنه کې د اکاډمیکو چارو مرستیال د کاپیسا ولایت د تخنیکي او مسلکي زده کړو د مرکزونو د یو شمېر ستونزو په اړه د دغه ولایت له مرستیال سره خبرې وکړې.
ښاغلي سنان دغه راز د تخنیکي او مسلکي زده کړو مرکزونو ته د زده کړو د اسانتیاوو په برابرولو کې د همکارۍ ژمنه وکړه.
