د تخنیکي او مسلکي زده کړو ادارې سرپرست رئیس د نیمروز پلازمینې زرنج له مسلکي انستیتوت څخه لیدنه وکړه
ښاغلي مولوي غلام حیدر شهامت، د تخنیکي او مسلکي زده کړو ادارې سرپرست نیمروز ولایت ته په خپل سفر کې د یاد ولایت د زرنج تخنیکي او مسلکي انستیتوت څخه لیدنه وکړه.
نوموړي او ورسره مل پلاوي د دغه ښوونیز مرکز ټول اسناد وکتل، د زده کړیالانو ستونزې یې له نږدې واورېدې. د عملي کار لپاره په ورکشاپ او لابراتوار کې د وسایلو کموالی د دغه انستیتوت اړینې ستونزې ګڼل شوې دي.
همدا اوس د تخنیکي او مسلکي زده کړو رئیس د دغه ادارې د یو پلاوي په رأس کې نیمروز ولایت ته تللی دی.
د هغوی د سفر موخه د تخنیکي او مسلکي زده کړو مرکزونو ستونزو او اړتیاو ته د حل لاره پیدا کول ګڼل شوي.
دغه پلاوي د بادغیس، هرات او فراه ولایتونو د تخنیکي او مسلکي زده کړو له مرکزونو لیدنه کړې ده.
