د تخنیکي او مسلکي زده کړو ادارې سرپرست په تخار کې د تخنیکي او مسلکي زده کړو د مرکزونو وضعیت بررسي کړ
مولوي غلام حیدر شهامت ولایتونو ته د خپل سفر په ترڅ کې د تخار ولایت د تخنیکي او مسلکي زده کړو له مرکزونو څخه لیدنه وکړه.
په دغې کتنه کې ښاغلي شهامت د تخنیکي او مسلکي زده کړو د مرکزونو له محصلینو او مسئولینو سره وکتل او خبرې یې وکړې.
دوی خپلې ستونزې او اړتیاوې د تخنیکي او مسلکي زده کړو ادارې له سرپرست سره شریکې کړې او د حل غوښتنه یې وکړه.
له بلې خوا د تخار ولایت د خیاطۍ او موبایل جوړولو د حرفوي کورسونو محصلینو د تخنیکي او مسلکي زده کړو ادارې سرپرست سره په کتنه کې د دغو کورسونو د زده کړې موده له دریو میاشتو څخه شپږو میاشتو ته د اوږدولو غوښتنه وکړه.
د دې ترڅنګ د څښاک د پاکو اوبو کمښت، د درسي کتابونو نشتوالی او د انټرنټ نه شتون د دغو مرکزونو له نورو ستونزو څخه دي.
د تخنيکي او مسلکي زده کړو رئيس د يادو ستونزو د حل په موخه د همکارۍ ژمنه وکړه. نوموړي دغه راز د تخار ولایت د تخنیکي مرکزونو مسئولینو ته د ځینو مسایلو په اړه لازمې لارښوونې وکړې.
