یوې خیریه موسسې انرژۍ او اوبو انسټیټوټ ته د ۲۳۰ نیالګي ډالۍ کړل
د «یتیم پالنې» په نوم یوې خیریه موسسې په کابل کې د انرژۍ او اوبو انسټیټوټ ته ۲۳۰ زینتي او قیمتي نیالګي ډالۍ کړل.
په همدې موخه جوړو شویو مراسمو کې د تخنیکي او مسلکي زده کړو ادارې سرپرست ښاغلي مولوي غلام حیدر شهامت په حضور کې د یتیم پالنې موسسې رئیس صادق صافي د دغه موسسې د فعالیتونو په اړه خبرې وکړې.
ښاغلي صافي وويل، دغه موسسه د يتيمانو لپاره حرفوي زده کړو زمینه برابروي او ملاتړ يې کوي.
هغه زياته کړه، چې د يتیم پالنې موسسې په ښوونيزو مرکزونو کې د ١٥٠٠ نجونو په ګډون سلګونه ماشومان په زده کړو بوخت دي.
د هغه په وينا، يادې موسسې په نوي کال کې د نيالګيو کښېنولو لپاره ٣٠ زره نيالګي وېشلي، چې له دې جملې څخه ١٧ زره نيالګي يتيمو کورنيو ته ورکړي دي.
د تخنيکي او مسلکي زده کړو ادارې سرپرست مولوي غلام حيدر شهامت د يتيم پالنې موسسې له مرستو او له يتيمانو سره د ملاتړ قدرداني وکړه.
ښاغلي شهامت وويل، د نيالګيو کښېنول او زده کړي د جاریه صدقې له جملې څخه دي.
په پای کې د تخنيکي او مسلکي زده کړو ادارې سرپرست د انرژۍ او اوبو له انسټیټوټ څخه ليدنه وکړه او د یاد انسټیټوټ اداري او تدريسي چاری یې بررسې کړی.
