ښاغلي مولوي غلام سعید احساس د نیمروز ولایت د تخنیکي و مسلکي زده کړو مرکزونو له مسوولینو سره ناسته تر سره کړه
د تخنیکي او مسلکي زده کړو ادارې پلاوي د نیمروز ولایت د تخنیکي او مسلکي زده کړو مرکزونو څخه د څارنې په ترڅ کې د یاد ولایت د تخنیکي او مسلکي زده کړو د مرکزونو له مسوولینو او کارکوونکو سره ناسته ترسره کړه.
په دې ناسته کې د تخنیکي او مسلکي زده کړو مرکزونو پر ستونزو او د اړتیاوو د حل پر څرنګوالي خبرې وشوې.
په دې کتنه کې محترم مولوي احساس وویل، چې د هېواد د ځوان نسل د روزنې په برخه کې خدمت کول زموږ د ټولو مسؤولیت دی او باید دغه مسؤولیت په صادقانه توګه ادا کړو. نوموړي همدارنګه ټینګار وکړ چې ټولې چارې باید د اسلام مبارک دین د اصولو سره سم تر سره شي.
ښاغلي مولوي احساس دغه راز د تخنیکي او مسلکي زده کړو مرکزونو د مسؤلینو د وړاندیزونو او ستونزو د حل د ژمنې ترڅنګ د ځینو مسایلو په اړه هغوی ته لازمې هدایات هم ورکړل.
همدارنګه یاد پلاوي دغونډې ګډونوالو ته د چارو د ښه والي په موخه سیمینار هم وړاندې کړ.
په ورته وخت کې محترم مولوي غلام سعید احساس د نیمروز ولایت د تخنیکي او مسلکي زده کړو مرکزونو مسوولین د نوموړو د ارزښتناکو خدمتونو له امله چې د تخنیکي او مسلکي زده کړو په برخه کې یې تر سره کړي و، د ستاینلیکونو او نقدي ډالیو په ورکولو سره وستایل.
