په بلخ کې د محبوسینو لپاره د مبایل ترمیم په برخه کې لنډمهاله حرفوي روزنیز پروګرام پیل شو
د بلخ ولایت د محبوسینو لپاره د مبایل ترمیم برخې لنډمهاله حرفوي پروګرام، د محبس مسولینو په همکارۍ د یاد ولایت د تخنیکي او مسلکي زده کړو آمریت لخوا پیل شو.
ټاکل شوې ده چې په یاد ښوونیز پروګرام کې به محبوسینو ته د دریو میاشتو په ترڅ کې د هوشمندو مبایلونو د ترمیم په اړه روزنه ورکړل شي.
د بلخ په محبس کې د دې روزنیز پروګرام د ترسره کولو موخه د محبوسینو لپاره د کاري زمینې برابرول او د بند له تېرولو وروسته د نوموړو اقتصادي وضعیت ښه کول دي.
د بلخ ولایت د محبس ریس حافظ عبدالرحمن همت د تخنیکي او مسلکي زده کړو ادارې له دې اقدام څخه قدرداني وکړه او ویې ویل چې دا اقدام کولی شي په ټولنه کې د محبوسینو د بیا ادغام په برخه کې بنسټیز رول ولوبوي.
