د کندز د ادارې او حسابدارۍ انسټیټوټ زده کړیالانو د یولسمې دورې د فراغت مراسم ترسره شول

د کندز د ادارې او حسابدارۍ انسټیټوټ د 45 تنه زده کړیالانو د فراغت مراسم د یاد ولایت د سیمه ییزو چارواکو په حضور کې ترسره شول.

 د دې مراسمو په پیل کې د کندز ولایت د تخنیکي او مسلکي زده کړو آمر ډاکټر فرید احمد لکڼ خېل خبرې وکړې او زده کړیالانو ته یې د فراغت مبارکي ورکړه.

نوموړي تخنيکي او مسلکي زده کړې د افغانستان د پرمختګ لپاره مهمې وبللې او له نورو ځوانانو يې وغوښتل چې د تخنيکي او مسلکي زده کړو په مرکزونو کې شامل شي.

 د مراسمو په دوام کې د کندز ولایت مقام دفتر رئیس مولوي عبدالغفور شهیدزي خبرې وکړې او نوي فارغ شوي ځوانان یې د خلکو د خدمت او خپلو زده کړو ته دوام ورکولو په موخه وهڅول.

نوموړي د ښوونېز او علمي بنسټونو له چارواکو او استادانو وغوښتل، چې د عصري علومو ترڅنګ د ديني علومو په تدريس کې هم هڅې وکړي.