د تخنیکي او مسلکي زدهکړو ادارې د ادارې او مدیریت زدهکړهییز پروګرام څخه د لسګونو مجاهدینو فراغت
د بامیان ولایت د تخنیکي او مسلکي زدهکړو مرکزونو د ادارې او مدیریت له زدهکړهییز پروګرام څخه شاوخوا د ۱۲۰ تنو مجاهدینو فراغت مراسم ترسره شول. په دې مراسمو کې د بامیان ولایت والي، الحاج قاري گل حیدر شفق، هم ګډون درلود او وینا یې وکړه.
قاري گل حیدر شفق د مجاهدینو فراغت په مراسمو کې د تخنیکي او مسلکي زدهکړو ادارې له مشرتابه څخه د مجاهدینو لپاره د زدهکړو زمینې برابرولو په برخه کې مننه او قدردانی وکړ.
نوموړي په خپلو خبرو کې زیاته کړه، چې نننۍ نړۍ په چټکۍ سره د علم، پیاوړي اقتصاد او پرمختللې ټکنالوژۍ پر لور روانه ده، او پرمختګ او ځانبسیاینه پرته له دې چې پر زدهکړو او پوهاوي پانګونه وشي، شوني نه دي.
د بامیان والي له فارغ شویو مجاهدینو وغوښتل، چې خپلې زدهکړې د هېواد د پرمختګ او ابادۍ په لاره کې وکاروي.
په همدې حال کې، د مرکزي لوړو سیمو زون د تخنیکي او مسلکي زدهکړو رئیس، مولانا خالد یعقوبي، وویل چې د مجاهدینو د زدهکړو طرحې له مخې، د هېواد په کچه په تخنیکي او مسلکي زدهکړو مرکزونو کې د مدیریتي زدهکړو ترلاسه کولو زمینه برابره شوې ده.
په بامیان ولایت کې د ادارې او مدیریت دغه زدهکړهییزه دوره په داسې حال کې پای ته رسېږي، چې تر دې دمه په ټول هېواد کې زرګونه مجاهدین د تخنیکي او مسلکي زدهکړو ادارې د ادارې او مدیریت له پروګرام څخه د فراغت اسناد تر لاسه کړي دي.
