د پکتيا ولایت تخنيکي او مسلکي زده کړو آمريت او د پکتيا پوهنتون ترمنځ د همکارۍ تفاهم لیک لاسليک شو
د علمي او مسلکي همکاریو د پراختیا په موخه، د پکتيا ولایت د تخنيکي او مسلکي زده کړو آمريت او د دې ولایت د پوهنتون ترمنځ د ګډو همکاریو تفاهمليک لاسليک شو.
دا تفاهملیک د دواړو بنسټونو ترمنځ د ښوونې، روزنې، اداري او تحصیلي چارو د همغږۍ، د ګډو علمي پروګرامونو د پلي کولو، د کار چاپېریال ستونزو د له منځه وړلو او د څېړنو او نوښتونو په برخو کې د همکارۍ لپاره ترتیب شوی دی.
د یاد تفاهمليک د محتوا له مخې، دواړه اړخونه ژمن دي تر څو د درې کلونو لپاره د خپلو امکاناتو او ظرفیتونو مطابق، یو له بل څخه ملاتړ کوي، او همداراز په دې برخه کې به ګډ مسؤلیتونه به پر غاړه اخلي او د زدهکړې، روزنې او عملي همکاریو د پراختیا لپاره په ګډه سره ګامونه پورته کوي.
دا تفاهمليک نه یوازې د تعلیمي بنسټونو ترمنځ د علمي او مسلکي همکاریو بنسټ پیاوړی کوي، بلکې د پکتيا ولایت د ځوان نسل لپاره د پرمختللو او اغېزمنو زده کړو زمینه هم برابروي. دغه اقدام د تعلیمي نهادونو ترمنځ د اغېزمنو همکاریو، څېړنو او علمي پراختیا لپاره یو مهم ګام بلل کېږي.
