د پنجشېر ولایت د تخنیکي او مسلکي زده کړو په مرکزونو کې د مجاهدینو روزنیز پروګرام پیل شو
د پنجشیر ولایت د مجاهدینو لپاره د اداري او مدیریت روزنیز پروګرام د دغه ولایت د یو شمیر سیمه ییزو چارواکو په شتون سره د تخنیکي او مسلکي زده کړو په مرکزونو کې پیل شو.
په دې مراسمو کې ویناوالو ټینګار وکړ چې مجاهدین باید د علم د حاصلولو لپاره له شته فرصت څخه اعظمي ګټه پورته کړي.
په همدې حال کې دپنجشير ولايت د امنیې قومندان په دې مراسمو کې وويل چې اسلامي نظام دکارکوونکو مسلکي کولو او ظرفيت لوړولو ته ژمن دى
نوموړي د تخنيکي او مسلکي زده کړو د ادارې له لوري د مجاهدينو د روزنيزې طرحې د چمتو کولو ستاينه وکړه او زياته يې کړه، چې د دغې طرحې پلي کېدل د هغو مجاهدينو لپاره چې د زده کړو د دوام څخه پاتي وي ډېر ارزښتناک خدمت دی.
دپنجشير ولايت دپوهنې رييس په دې مراسمو کې وويل چې د تعلیمي سویې له تثبیت وروسته څه ناڅه ١٥٠ تنه د تخنيکي او مسلکي زده کړو په مرکزونو کې د ادارې او مديريت د زده کړې په موخه شامل شوي دي.
