د خوست ولایت د تخنیکي او مسلکي انسټيټوټ او پامیر د لوړوزده کړو مؤسسې ترمنځ هوکړه لیک لاسلیک شو
د خوست ولایت د تخنیکي او مسلکي انسټيټوټ مسؤلین د ګډو همکاریو د پراختیا په موخه په یاد ولایت کې د پامیر لوړو زده کړو له مؤسسې سره د هوکړه لیک د لاسلیک کولو خبر ورکوي.
د دواړو ښوونیزو بنسټونو ترمنځ د دغه تفاهم لیک د لاسلیک کولو موخه د همکاریو او همغږۍ پراختیا او همدارنګه د خوست تخنیکي انسټيټوټ فارغانو لپاره د لوړو زده کړو د فرصتونو برابرول ویل شوي دي.
د یاد هوکړه لیک پر بنسټ ، به د خوست تخنیکي او مسلکي انسټيټوټ فارغان د زده کړو د دوام په موخه په ځانګړي تخفیف سره په پامیر لوړو زده کړو موسسه کې شامل شي.
همدارنګه، د دواړو ښوونیزو بنسټونو محصلینو لپاره د عملي زده کړو، علمي سفرونو او ګډو ښوونیز ورکشاپونو لپاره زمینه برابرول، ددې هوکړه لیک له موادو څخه دي.
دا په داسې حال کې ده چې د تخنیکي او مسلکي زده کړو ادارې رهبري تل هڅه کوي ترڅو د خصوصي او حکومتي بنسټونو سره د تفاهم لیکونو په لاسلیک کولو سره د تخنیکي او مسلکي زده کړو مرکزونو زده کونکو لپاره مناسب او غوره تدریسي چاپیریال چمتو کړي.
