د تخنیکي او مسلکي زده کړو ادارې پلاوي د هلمند تخنیکي آمرینو سره ناسته ترسره شوه
د تخنیکي او مسلکي زده کړو ادارې پلاوي د دغې ادارې د تخنيکي او مسلکي چارو مرستيال ښاغلي مولوي غلام سعيد احساس په مشرۍ د هلمند ولایت تخنیکي مرکزونو د بررسي کولو په پای کې د ښوونیزو مرکزونو له آمرینو سره غونډه ترسره کړه.
د دغې ناستې موخه د یاد ولایت د تخنیکي مرکزونو ستونزو ته د حل لارې موندل او د اړتیاوو پوره کول دي.
د دغې ناستې په پيل کې د تخنيکي او مسلکي چارو مرستيال د دغې ادارې ځينې لاسته راوړنې يادې کړې او ويې ويل، چې اوسمهال د تخنيکي او مسلکي زده کړو اداره په خپل اصلي مسیر کې حرکت کوي.
نوموړي وويل، د بې وزلۍ له منځه وړل او د ماهر او مسلکي ځواک روزل د دغې ادارې له اساسي موخو څخه دي او بايد د لاسته راوړلو لپاره يې زياتې هڅې وشي.
ښاغلي مولوي احساس هم په تخنيکي مرکزونو کې د زياتو محصلينو پر جذب ټينګار وکړ او ويې ويل چې د ولايتي آمرین بايد د منبرونو، جوماتونو او غونډو له لارې د دغې ادارې د پرمختګ په برخه کې لا زيات کار وکړي.
د تخنيکي او مسلکي چارو مرستيال هم په دغې کتنه کې وويل چې له عصري کرنې څخه د زياتې استفادې لپاره بايد هلې ځلې وشي چې له عصري کرنې څخه په استفادې سره د هېواد د بزګرانو حاصلات زيات شي.
