د تخنیکي او مسلکي زده کړو ادارې سرپرست د یونسکو د دفتر له سرپرست سره وکتل
د تخنیکي او مسلکي زده کړو ادارې سرپرست مولوي غلام حیدر شهامت د ملګرو ملتونو د تعلیمي، علمي او فرهنګي (یونسکو) سازمان له مشرې پاتریشیا مک فیلیپس سره په خپل کار دفتر کې وکتل.
په دې کتنه کې د دواړو لورو ترمنځ د همکارۍ پر محورونو او د تخنیکي او مسلکي زده کړو ادارې پر اړتیاوو خبرې وشوې.
ښاغلي شهامت په پیل کې د یونسکو پلاوي ته ښه راغلاست ووایه او زیاته یې کړه چې د یاد سازمان موخې ښوونه او روزنه او د بې وزلۍ له منځه وړل دي چې تخنیکي او مسلکي زده کړو اداره هم دغه موخې تعقیبوي.
د تخنيکي او مسلکي زده کړو ادارې سرپرست ټينګار وکړ چې یاده اداره، يونيسکو او ملګري ملتونه ګډ شعار او موخې لري.
د يونسکو د دفتر مشرې هم تخنيکي او مسلکي زده کړې د بېوزلۍ په کمولو او د اقتصادي ودې په برخه کې اغېزمنې وبللې او ويې ويل، چې يونسکو د تخنيکي او مسلکي زده کړو ملاتړ ته لېواله ده.
آغلې پاتریشیا مک فیلیپس د تخنیکي او مسلکي زده کړو ادارې له مشرتابه څخه وغوښتل چې د یونسکو سره هغه برخې چې مرستې ته اړتیا لري شریکې کړي.
د تخنيکي او مسلکي زده کړو ادارې سرپرست د يونسکو د مرستو ستاينه وکړه او ويې ويل، چې په تېر حکومت کې د فساد له امله د دې ادارې مرستې اړمنو کسانو ته نه وې رسېدلې«له نیکمرغه چې اوس فساد له منځه تللی دی».
په دې کتنه کې د څیړنې او پروګرامونو د پراختیا رئیس دلاور درمل او د یادې ادارې د پلان او ستراتیژیکې همغږۍ آمر روح الله شفیق د دې ادارې لاسته راوړنو او اړتیاوو په اړه توضیحات ورکړل.
د يونسکو سرپرست د تخنيکي او مسلکي زده کړو ادارې لاسته راوړنې وستايلې او وړانديز يې وکړ، چې د همغږۍ او همکارۍ د پراختيا په موخه دې دوه کاري ګروپونه جوړ شي.
پاتریشیا مک فیلیپس وویل چې یونسکو کولی شي د تخنیکي او مسلکي زده کړو له ادارې سره د معلوماتو راټولولو، وضعیت سروې او د ظرفیت لوړولو په برخه کې همکاري وکړي.
هغه د نجونو لپاره د اسانتیاوو په برابرولو ټینګار وکړ او ویې ویل چې د ښځو په مهارتونو پانګونه اړینه ده.
د تخنيکي او مسلکي زده کړو ادارې سرپرست د ښځو او نجونو لپاره د زده کړو د زمينې د برابرولو په اړه ډاډ ورکړ او ويې ويل، چې زده کړه په نارينه او ښځينه دواړو فرض ده او په دې برخه کې هيڅ شک نشته.
ښاغلي شهامت وویل چې د ښځو او نجونو لپاره د غوره زده کړو د رامنځته کولو هڅې روانې دي.
د تخنيکي او مسلکي زده کړو ادارې سرپرست وويل، یاده اداره په پام کې لري چې د کار بازار ته د نږدې کېدو په موخه په صنعتي ښارګوټې کې انسټیټوټ جوړ کړي او په دې برخه کې د استادانو لپاره د ظرفيتونو د لوړولو پروګرامونه پرانېزي.
ښاغلي شهامت د یونسکو له خوا ځانګړې زده کړو ته د پاملرنې غوښتنه وکړه او ویې ویل، چې ړانده او کاڼه تر ټولو ډېر مستحق دي.د تخنيکي او مسلکي زده کړو ادارې سرپرست وويل، دغه اداره د ړندو او کاڼو لپاره د امکان تر حده امکانات او اسانتياوې برابرې کړي دي.
په دې کتنه کې موافقه وشوه چې کاري ډلې به د همکارۍ او همغږۍ لپاره په ګډه کار کوي.
