د تخنیکي او مسلکي زده کړو ادارې اونیزه اصلاحي غونډه ترسره شوه
د تخنیکي او مسلکي زده کړو ادارې اوونیزه اصلاحې غونډه د دغه ادارې د حرفوي برنامو د سمون رئیس مولوي عبدالودود هوتک د وینا او کارکوونکو په حضور کې ترسره شوه.
نوموړي په خپلو خبروکې د شکر ادا کوونې او د هغه پر اهمیت یې خبرې وکړې.
ښاغلي هوتک وویل چې الله (ج) فرمایلي دي چې نعمتونه په شکر کولو سره زیاتیږي او په نعمتونو کفر د عذاب سبب کیږي.
هغه زياته کړه، د اسلام د ستر پيغمبر (ص) د احاديثو له مخې هر مسلمان بايد په دنياوي چارو کې ځان له هغه څخه پورته خلکو سره پرتله نه کړي.
ښاغلي هوتک وویل: "موږ باید له ځانه کښته خلکو ته وګورو او د هغه څه لپاره شکر ادا کړو چې موږ یې لرو، نو په هغه وخت کې بیا د آرامتیا احساس کوو."
د تخنيکي او مسلکي زده کړو ادارې د حرفوي برنامو د سمون رئيس زياته کړه، چې په ديني مسايلو کې بايد "له ځانه پورته خلکو ته وګورو او هڅه وکړو چې هغه ځای ته ځان ورسوو."
غونډه د خیر دعا په ویلو سره پای ته ورسیده.
