د بلخ ولایت اړوند نفتو او ګازو انسټیټوټ محصلینو له کرکر کان او غوري د سمنټ تولیدی کارخونې څخه لیدنه وکړه
د بلخ ولایت د نفتو او ګازو انسټیټوټ د جامدو کانونو څانګې محصلینو د بغلان ولایت اړوند له کرکر سکارو کان او د غوري سمنټو د تولیدي کارخونې ته د یو علمی سفر په ترڅ کې د جامدو کانونو په اړه روزنه ترلاسه کړه.
لارښود استاد د دې علمي سفر په ترڅ کې، محصلینو ته د سمنټو د تولید، سکارو «ذغال سنګ» استخراج د څرنګوالي او ارزښت په اړه مفصل توضیحات وړاندې کړل او د نوموړو پوښتنو ته یې هم ځوابونه ورکړل.
علمي سفرونه د نظري زده کړو او د کاري او صنعتي چاپیریال واقعیتونو ترمنځ د نښلولو لپاره له خورا اغیزمنو لارو څخه ګنل کېږي. په ښوونیزو چاپیریالونو، په ځانګړي توګه د تخنیکي او مسلکي زده کړو مرکزونو کې، عملي زده کړې د محصلینو د مهارتونو په لوړولو او د کار بازار لپاره د هغوی په چمتو کولو کې کلیدي رول لوبوي.
د عملي روزنو زده کړه محصلینو سره مرسته کوي چې هغوی مطالب په ژوره توګه او علمي مفاهیم په ډیر کاربردي او عملي ډول درک کړي.
له همدې امله، د تخنیکي او مسلکي زده کړو ادارې رهبري تل هڅه کوي چې د تخنیکي او مسلکي زده کړو په مرکزونو کې د عملي زده کړو لړۍ پیاوړې کړي.
