د ارزګان ولایت د تخنیکي او مسلکي زده کړو کارکوونکو ته د ظرفیت لوړونې سیمینار جوړ شو
د تخنيکي او مسلکي زده کړو ادارې د تخنیکي چارو مرستيال مولوي غلام سعيد احساس په مشرۍ يوه پلاوي ارزګان ولايت ته د خپل سفر په ترڅ کې د یاد ولايت د تخنيکي او مسلکي زده کړو د مرکزونو له مسوولينو سره وکتل.
په دې کتنه کې محترم مولوي احساس د ارزګان د تخنیکي او مسلکي زده کړو له مسؤلینو څخه وغوښتل چې خپل مسوولیتونه په سمه توګه ترسره کړي، نوموړي د تخنیکي او مسلکي زده کړو په مرکزونو کې د کاري چارو د ښه والي په موخه هغوی ته لازمې هدایت هم ورکړل.
په دې غونډه کې د ارزګان د تخنیکي او مسلکي زده کړو مرکزونو د کارکوونکو لپاره د کاري او تدریسي چارو د ښه والي په موخه سمینار هم وړاندې شو.
په دې سیمینار کې «د محصلینو او متعلمینو چارو، د تعلیمي نصاب تطبیق، د تعلیمي څارنې او ارزونې، مالي او دفتر دارۍ چارو، د کارکونکو چارو (بشري منابعو)، پلان، دعوت او ارشاد، او د څیړنې او نوښت» په څیر موضوعات د کارکوونکو لپاره تشریح شول.
