د لغمان محبس ته علمي کتابونه او مجلې ډالۍ شوې
د لغمان ولایت د تخنیکي او مسلکي زدهکړو آمریت د خپلو اړوندو ښوونیزو مرکزونو له لارې د بېلابېلو موضوعاتو په اړه ۴۴ ټوکه کتابونه او ۳۵ ټوکه علمي مجلې د لغمان ولایت د محبس آمریت ته ډالۍ کړې.
دغه کتابونه د کتاب لوستنې د فرهنګ د پیاوړتیا، بندیانو ته د علمي او فکري استفادې د زمینې برابرولو او د هغوی د اصلاح له بهیر څخه د ملاتړ په موخه د محبس مسؤلینو ته وسپارل شول، ترڅو بندیان وکولای شي يه خپل فارغ وخت کې ترې ګټه واخلي.
د لغمان ولایت د تخنیکي او مسلکي زدهکړو آمریت مسؤلین وایي، بندیانو ته د علمي او ښوونیزو سرچینو د لاسرسي برابرول د هغوی د پوهې په لوړولو، د اصلاحپذیرۍ روحیې په پیاوړتیا او ټولنې ته د سالم او اغېزمن بېرته ورګرځېدو لپاره مهم رول لري.
دا اقدام د دولتي ادارو ترمنځ د همکاریو په چوکاټ کې، د مطالعې د فرهنګ د پراختیا، د عامه پوهاوي د کچې د لوړولو او د لغمان ولایت په محبس کې د ښوونیزو او اصلاحي پروګرامونو د ملاتړ په موخه ترسره شوی دی.
د لغمان ولایت د محبس مسؤلینو د تخنیکي او مسلکي زدهکړو آمریت له دې اقدام څخه مننه او قدرداني څرګنده کړه.
