د ساختمان د لیول کارۍ په برخه کې د بهسود کثیرالرشتوي انسټیټوټ زده کوونکو د عملي زده کړو بهیر
د میدان وردګو ولایت اړوند بهسود کثیرالرشتوي انسټيټوټ د دولسم ټولګي زده کوونکو د ساختمان د لیول کولو د څرنګوالي په اړه په عملي بڼه روزنه ترلاسه کړه.
نوموړو ته په دې درسي جلسه کې، د استاد له لوري د لیول ماشین په واسطه د ساختمان د لیول کولو او همدارنګه د شاقول د کارولو طریقه په عملي ډول تشریح شوه، او د موضوع په اړه یې خپلې پوښتنې او سوالونه هم شریک کړل.
دغه راز په دوام کې لارښود استاد د لیول کولو په برخه کې د زده کوونکو پوښتنو ته مفصل ځوابونه ورکړل.
د تخنیکي او مسلکي زده کړو په مرکزونو کې د روزنې ډیری برخه عملي ده، څرنګه چې د تخنیکي او مسلکي زده کړو مرکزونو فراغان په مستقیم ډول د کار بازار ته جذب کیږي.
له همدې امله، د تخنیکي او مسلکي زده کړو ادارې رهبري تل د تخنیکي او مسلکي زده کړو په مرکزونو کې د عملي زده کړو پر پیاوړتیا ټینګار کوي.
