د تخنیکي او مسلکي زده کړو ادارې اصلاحي غونډه ترسره شوه
د تخنیکي او مسلکي زده کړو ادارې، اصلاحي غونډه د یادې ادارې د کارمندانو په ګډون او د افغانستان دعلومو اکاډمۍ غړي ښاغلي شیخ امیرجان ثاقب په وینا سره ترسره شوه.
په دې اصلاحي غونډه کې، ښاغلي شیخ امیرجان ثاقب د تخنیکي او مسلکي زده کړو او اصلاحي پروګرامونو د ارزښت په اړه خبرې وکړې.
نوموړي په دې غونډه کې د وینا پر مهال، وویل چې؛ اصلاحي پروګرامونه د مؤمنانو زړونه او چلند اصلاح کوي او د الله تعالی د رضایت لامل ګرځي.
هغه دا هم زیاته کړه چې تخنیک او مسلک د یوې ټولنې له بنسټيزو برخو څخه ګڼل کېږي او په دې برخه کې زده کړې کول په ټولنه کې د فقر او بې کارۍ په له منځه وړلو کې خورا اړین رول لوبوي.
د دې اصلاحي پروګرام په دوام کې، شیخ امیرجان ثاقب له ګډونوالو وغوښتل چې اصلاحي ناستو کې ګډون او د اصلاحي ناستو موضوعات په خپل ورځني ژوند کې پلي کړي.
د تخنیکي او مسلکي زده کړو ادارې د دعوت او ارشاد ریاست هر اونۍ د شنبې په ورځ اصلاحي غونډه جوړوي چې په دې ناسته کې د بیلابیلو اصلاحي، اخلاقي، ټولنیز او عقیدوي موضوعاتو په اړه بحث کیږي.
