ښاغلي مولوي غلام حیدر شهامت د پنځو ولایتونو تخنیکي او مسلکي زده کړو مرکزونه بررسي کړل
د تخنیکي او مسلکي زده کړو ادارې ښاغلي مولوي غلام حیدر شهامت د یوه پلاوي په مشرۍ د هېواد په پنځو ولایتونو کې د تخنیکي او مسلکي زده کړو د مرکزونو وضعیت وارزاوه.
په دغو ولایتونو کې بغلان، کندز، تخار، سمنګان او مزار شامل دي.
د دغه سفر په ترڅ کې د تخنيکي او مسلکي زده کړو ادارې سرپرست په دغه سفر کې د ولايتونو د واليانو او د علماوو د شورا او د رئيسانو په ګډون د ولايتونو له سيمه ييزو چارواکو سره وکتل او خبرې يې وکړې.
نوموړي له سیمه ییزو چارواکو سره په لیدنه کې د تخنیکي او مسلکي زده کړو پر اهمیت او همدارنګه د تخنیکي او مسلکي زده کړو د مرکزونو د اړتیاوو د حل او همکارۍ په اړه خبرې وکړې.
په همدې حال کې د ولایتونو سیمه ییزو چارواکو هم خپلو ولایتونو ته د تخنیکي او مسلکي زده کړو ادارې د پلاوي له راتګ څخه د مننې ترڅنګ له دغې ادارې سره د هر اړخیزو همکاریو ډاډ ورکړ.
له بل پلوه ښاغلي مولوي غلام حیدر شهامت یادو ولایتونو ته د خپل سفر په ترڅ کې د لنډ مهاله حرفوي زده کړو برنامو د لیدنې ترڅنګ په بلخ کې د مجاهدینو او نویو ګمارل شویو کارکوونکو لپاره د روزنیزه برنامه هم پرانیسته.
په دغې برنامې کې د بلخ د تخنيکي آمریت له خوا مجاهدينو او نويو ګمارل شويو کارکوونکو ته د ادارې او مديريت مهارتونه، کمپيوټر او انګليسي ژبې تدريس کېږي.
تر دې وړاندې هم په ولایتونو کې یو شمېر مجاهدین له دغو روزنیزو برنامو څخه فارغ شوې دي.
ښاغلي شهامت د مجاهدینو لپاره د ښوونیزې برنامې د پرانستلو پر مهال وویل چې د «جهاد پر مهال زما یو ارمان د مجاهدینو روزل وو او خوښ یم چې دغه هیله مې پوره شو».
دغه راز د ولايتونو د تخنيکي آمرینو د تخنيکي او مسلکي زده کړو ادارې له سرپرست سره په کتنه کې خپلې ستونزې او اړتياوې شريکې کړې او د حل غوښتنه يې وکړه.
د معیاري نصاب نشتوالی، تدریسي ودانۍ او د عملي کارونو لپاره د وسایلو نشتوالی د ولایتونو له لویو ننګونو څخه بلل کیږي.
ښاغلي مولوي شهامت د یادو ولایتونو د تخنیکي زده کړو د مرکزونو اړتیاوو ته د پاملرنې ژمنه وکړه او هغوی ته یې د ځینو مسایلو په اړه لازمې لارښوونې هم وکړې.
تر دې وړاندې د دغې ادارې پلاوي د تخنيکي او مسلکي چارو مرستيال ښاغلي مولوي غلام سعيد احساس په مشرۍ د تخنيکي او مسلکي زده کړو مرکزونو بررسي په موخه خوست، پکتيا، پکتيکا، کنړ، نورستان، لوګر او ننګرهار ولايتونو ته سفرونه کړي وو.
