د نیمروز تخنیکي او مسلکي زده کړو آمریت د دغه ولایت پوهنې ریاست سره د همغږۍ غونډه ترسره شوه
د نیمروز ولایت تخنیکي او مسلکي زده کړو آمریت او د یاد ولایت پوهنې ریاست د مسوولینو ترمنځ د دغه دوه نهادونو د همغږۍ په موخه غونډه ترسره شوه.
په دغه کتنه کې د نيمروز ولايت پوهنې رئيس مولوي ګل احمد حقاني د یاد ولايت تخنيکي او مسلکي زده کړو آمر د لاسته راوړنو د ستاينې ترڅنګ د پوهنې له رياست سره د همکارۍ او همغږۍ پر دوام ټينګار وکړ.
په ياده غونډه کې د تخنيکي او مسلکي زده کړو آمر مولوي نظيف الله عثماني د تخنيکي او مسلکي زده کړو د برنامو پر اهميت خبرې وکړې. هغه وويل: "موږ ټولنې ته مسلکي ځوانان وړاندې کوو، ځکه چې د دغه آمریت د کرنې او برښنا څانګو فارغان په عملي ډول په يادو برخو کې خپلې دندې ترسره کوي."
