په بلخ کې د ظرفیت لوړونې له روزنیزې دورې څخه ۵۵ نوي ګمارل شوي کارکوونکي فارغ شول
په بلخ کې د دولتي ادارو ۵۵ نوي ګمارل شوي کارکوونکي له دوه میاشتنۍ روزنیزې دورې څخه چې د یاد ولایت د ادارې او حسابدارۍ د انسټیټوټ له خوا په لاره اچول شوی وه، فارغ شول.
په هغو مراسمو کې چې د سیمه ییزو چارواکو په ګډون جوړه شوې وه، دوی د فراغت تصدیق پاڼې ترلاسه کړي.
دا د بلخ د ادارې او حسابدارۍله انسټیټوټ څخه د اسلامي امارت د نویو ګمارل شویو کارکوونکو او مجاهدینو د فراغت دریمه دوره ده.
په دغه روزنیزه دوره کې اداري او کمپیوټري مهارتونه تدریس شوي دي.
د تخنیکي او مسلکي زده کړو اداره سږ کال د اسلامي امارت د نویو ګمارل شویو کارکوونکو او مجاهدینو د ظرفیت لوړولو په موخه په ۸ ولایتونو کې څه باندې دوه زره کسانو ته لنډ مهاله روزنیز کورسونه جوړ کړي دي.
