د چک کثیرالرشتوي انسټيټوټ زده کوونکو ته د ساختماني چارو په اړه عملي روزنه ورکړل شوه

د میدان وردګو ولایت اړوند چک ولسوالۍ کثیرالرشتوي انسټيټوټ د ساختمانی څانګې زده کوونکو د یادې ولسوالی د برق فابریکې ته د علمي سفر په ترڅ کې د «ساختماني چارو» په اړه په عملي بڼه روزنه ورکړل شوه.

لارښود استاد د درس په ترڅ کې، زده کوونکو ته د «ساختمان قالب بندي، سیخبندۍ، کانکړیټ او نورو ساختماني چارو» په اړه هم مفصل توضیحات وړاندې کړل.

د زده کوونکو په کاري راتلونکي کې د عملي زده کړو اهمیت او ارزښت ته په پام سره، د تخنیکي او مسلکي زده کړو مرکزونو کې ۶۰ سلنه زده کړې په عملي ډول وړاندې کیږي. دا زده کړې د زده کړیالانو د حرفوي مهارتونو په لوړولو کې مهم او ارزښتناک رول لوبوي.

له همدې امله د تخنيکي او مسلکي زده کړو ادارې رهبري تل د تخنيکي او مسلکي زده کړو په مرکزونو کې د عملي زده کړو پر پياوړتيا ټينګار کوي.