د مولوي غلام سعید احساس او کندهار ولایت د تخنیکي و مسلکي زده کړو مرکزونو مسوولینو تر منځ ناسته ترسره شوه
د ښاغلي مولوي غلام سعید احساس په مشرۍ د تخنیکي او مسلکي زده کړو ادارې پلاوي د کندهار ولایت د تخنیکي او مسلکي زده کړو مرکزونو څخه د څارنې په ترڅ کې د یاد ولایت د تخنیکي او مسلکي زده کړو د مرکزونو له مسوولینو او کارکوونکو سره ناسته ترسره کړه.
په دې ناسته کې د تخنیکي او مسلکي زده کړو مرکزونو پر ستونزو او د اړتیاوو د حل پر څرنګوالي خبرې وشوې.
په دې کتنه کې محترم مولوي احساس وویل، د تخنیکي او مسلکي زده کړو اداره په پام کې لري چې په مرکز او ولایتونو کې معیاري انسټیټوټونه جوړ کړي نوموړي همدارنګه ټینګار وکړ چې استادان او کارکوونکي باید د وخت تابع او پر وخت پابنده اوسي.
نوموړي دغه راز د تخنیکي او مسلکي زده کړو مرکزونو د مسؤلینو د وړاندیزونو او ستونزو د حل د ژمنې ترڅنګ د ځینو مسایلو په اړه هغوی ته لازمې هدایات هم ورکړل.
همدارنګه یاد پلاوي دغونډې ګډونوالو ته د چارو د ښه والي په موخه سیمینار هم وړاندې کړ.
کندهار ولایت ته د دغه پلاوي د سفر موخه په یاد ولایت کې د تخنیکي او مسلکي زده کړو د مرکزونو د وضعیت څېړل او د دغو مرکزونو ستونزو او ننګونو ته رسیدګی ویل شوې ده.
د يادونې وړ ده، چې د تخنيکي او مسلکي زده کړو ادارې پلاوي تر دې وړاندې د کندهار ولايت د مرکز، ډنډ، سپین بولډک، ژری اوپنجوايي ولسوالیو د تخنيکي او مسلکي زده کړو مرکزونو له وضعیت څخه څارنه ترسره کړې ده.
په ورته وخت کې محترم مولوي غلام سعید احساس د کندهار ولایت د تخنیکي او مسلکي زده کړو مرکزونو مسوولین د نوموړو د ارزښتناکو خدمتونو له امله د ستاینلیکونو او نقدي ډالیو په ورکولو سره وستایل.
