د تخنیکي او مسلکي زده کړو د ادارې رئیس، د افغانستان لپاره د ناروې کمیټې له ښاغلي مشرتابه پلاوي سره وکتل او پهٔ مختلفو تخنیکي برخو کې یې خبرې اترې وکړې
د تخنیکي او مسلکي زده کړو د ادارې رئیس، الحاج مولوي غلام حیدر شهامت د خپل کاري دفتر په مقر کې د افغانستان لپاره د ناروې کمیټې له محترم مشرتابه پلاوي سره چې مشري یې پروفیسور ګري سینووي کوله، د یادې کمیټې د بورډ مرستیالي او تقاعد شوې استازې پر غاړه لرله، کتنه او بحث وکړ.
په نننۍ ناسته کې د تخنیکي او مسلکي زده کړو ادارې او د ناروې کمیټې تر منځ د تخنیکي او مسلکي برنامو د پراختیا، د ځانګړو زده کړو د استادانو د ظرفیت لوړولو، د تعلیمي نصاب د تدوین، د کار بازار د څېړنې او تحلیل، او همدارنګه د کنړ ولایت د زلزله ځپلو لپاره د سرپناه د جوړولو په برخه کې د ادارې له ولایتي تخنیکي ټیم سره په همغږۍ خبرې وشوې او لازمې پریکړې ترسره شوې چې دواړو لوریو د یادو همکاریو د دوام پر اړتیا ټینګار وکړ.
په همدغهٔ تړاو مولوي شهامت څرګنده کړه چې د تخنیکي او مسلکي زده کړو اداره د لا پراخو همکاریو لپاره لازم شرایط برابروي او چمتو ده چې د ناروې کمیټې د پروګرامونو د پیاوړتیا او مخته بیولو لپاره هر اړخیزه همکاري وکړي، همدارنګه د تخنیکي او مسلکي زده کړو سرپرست رئیس د ناروې کمیټې له پرله پسې همکاریو مننه وکړه او له هغوی څخه یې وغوښتل چې په بېلابېلو تعلیمي برخو کې د ګډو همکاریو بهیر لا پراخ کړي.
