د تخنیکي او مسلکي زده کړو ادارې سرپرست پروان ته سفر وکړ
ښاغلي غلام حیدر شهامت، د تخنیکي او مسلکي زده کړو ادارې سرپرست د تخنیکي او مسلکي زده کړو مرکزونو د وضعیت د څېړلو لپاره پروان ولایت ته سفر کړی دی.
ددغه سفر موخه د تخنیکي او مسلکي مرکزونو د وضعیت څېړل، او د هغوی د اړتیاو پوره کول بیان شوي دي.
په همدې حال کې، مولوي محمدزی رسولي، د پروان ولایت د تخنیکي او مسلکي زده کړو آمر د یاد ولایت د تخنیکي او مسلکي زده کړو د وضعیت په هکله راپور وړاندې کړ.
د پروان تخنیکي آمر د تخنیکی او مسلکي زده کړو ادارې له سرپرست سره په لیدنه کې؛ په ډېری مرکزونو کې د اوبو او برق نشتون اساسي ستونزې وبللې.
له بل پلوه، دغه هیأت د پروان د تخنیکي آمریت، پلان او تدارکاتي اسناد وکتل، او د کارکوونکو سوانح یې هم و ارزولې.
ددغه ناستې په پای کې؛ د تخنیکي او مسلکي زده کړو سرپرست، د پروان تخنیکي آمریت د اړتیاو د پوره کېدلو ترڅنګ مسؤلینو ته په ځینو موضوع ګانو کې لازمې لارښوونې وکړې.
