د تخنيکي او مسلکي زده کړو د ادارې چارواکو د هوايي چلند وزارت له پلاوي سره ناسته ترسره شوه

د یادې ادارې مالي او اداري چارو مرستيال مفتي فضل الرحمن فاضل په ګډون د تخنيکي او مسلکي زده کړو ادارې د چارواکو د ټرانسپورټ او هوايي چلند وزارت پلاوي سره د یاد وزارت عملياتي مرستيال کپتان غلام جيلاني وفا په مشرۍ ناسته ترسره شوه.

 په دې کتنه کې د دواړو ادارو ترمنځ د لاسليک شوي هوکړه ليک د بیاکتنې او دغه راز د هوايي چلند انسټيټوټ د ښوونیز نصاب په باب خبرې وشوې.

 په پیل کې د ترانسپورت وزارت عملیاتي مرستیال کیپتان غلام جیلاني وفا د غونډې د اجنډا په اړه خبرې وکړې او د یاد وزارت او د تخنیکي او مسلکي زده کړو ادارې ترمنځ یې په همغږۍ ټینګار وکړ.

ورپسې د هوايي چلند د انسټيټوټ رئیس صبغت الله کاکړ د یاد انسټیټوټ د ښوونیز نصاب په اړه خبرې وکړې او ويې ويل، چې د هوايي چلند د انسټيټوټ د څانګو زياتوالي ته اړتيا لري.

ښاغلي کاکړ ټینګار وکړ چې د انسټیټوټ ښوونیز نصاب باید د ملکي هوايي چلند د نړیوال سازمان (ICAO) له معیارونو سره سم وي.

په دې اړه د تخنيکي زده کړو ادارې د څيړنې او کيفيت د تضمين رئيس دلاور درمل وويل، دغه اداره هڅه کوي، چې د خپلو ټولو مرکزونو او څانګو ښوونیز نصاب له نړيوالو معيارونو سره برابر کړي.

 هغه وويل، د هوايي چلند د انسټیټوټ جوړښت به هم د هوايي چلند وزارت د غوښتنې او مشورې له مخې وڅېړل شي.

په پاى کې پریکړه وشوه چې د دواړو ادارو کاري کميټې د هوکړه لیک د بیاکتنې په پار جوړې او دارنګه د هوايي چلند د انسټیټوټ د ښوونیز نصاب د ارزونې په موخه خبرې وکړی.