د کابل د کرنې انسټیټوټ څخه د تخنیکي او مسلکي زده کړو ادارې د رهبرۍ لیدنه
د تخنيکي او مسلکي زده کړو ادارې مشر ښاغلی مفتي فضل الرحمن فاضل د دغه ادارې د اکاډمیکو چارو مرستيال نورمحمد عزيزي سره د کابل د کرنې له انسټیټوټ څخه ليدنه وکړه.
د تخنیکي او مسلکي زده کړو ادارې مشرتابه د کرنې د انسټیټوټ له امر او استادانو سره په کتنه کې د هغوی ستونزې او وړاندیزونه واورېدل.
د کرنې د انسټیټوټ استادان د انسټیټوټ د درسی ودانۍ نشتوالى يوه جدي ننګونه بولي او د دې ستونزې د هواري لپاره د تخنيکي او مسلکي زده کړو ادارې د مشرتابه د پاملرنې غوښتنه کوي.
د تخنيکي او مسلکي زده کړو ادارې مشر ژمنه وکړه چې دغه موضوع به جدي ونيسي.
د تخنيکي او مسلکي زده کړو ادارې مشرتابه هم په هېواد کې د شنې فضا او ښېرازۍ په موخه د کرنې د انسټیټوټ له څېړنيز فارم څخه ليدنه وکړه او يو شمېر نيالګي يې کېنول.
ښاغلي فاضل په یوه پیغام کې ویلي چې افغانستان یو کرنیز هېواد دی چې د کرنې لپاره ښه اقلیم لري. هغه خلک وهڅول چې "د دې ځمکې او اوبو څخه کار واخلي او خپل ملک جوړ کړي.
د تخنیکي او مسلکي زده کړو ادارې د اکاډمیکو چارو مرستیال نورمحمد عزیزي هم په یوه پیغام کې ویلي، چې د هېواد ډېری وګړي په کرنې بوخت دي او د افغانستان ا.ا ژمنه ده، چې کرنې سکتور ته جدي پاملرنه وکړي.
ښاغلي عزيزي همدا راز د نيالګيو ايښودل يوه صدقه جاریه وبلله او ښاريان يې وهڅول چې نيالګي کېنوي او شنه فضا پراخه کړي.
