د تخنيکي او مسلکي زده کړو ادارې سرپرست د ښځو بنسټ د پروګرام له مدیر سره وکتل

د تخنيکي او مسلکي زده کړو ادارې سرپرست مولوي غلام حيدر شهامت د ښځو بنسټ پروګرامونو (Womanity Foundation) له مسؤل سره وکتل.

په دې کتنه کې د ښځو د بنسټ د پروګرامونو مدیر محمد ضيا نوري د همکارۍ د هغه هوکړه ليک د عملي کولو په څرنګوالي خبرې وکړې چې د یاد بنسټ او د تخنيکي او مسلکي زده کړو د ادارې ترمنځ لاسليک شوی دی.

ښاغلي نوري وویل چې د لاسلیک شوي هوکړه لیک پر بنسټ د ښځو بنسټ د کابل د کمپیوټري تکنالوژۍ انسټیټوټ څه باندې سل زده کړیالان او 24 ښځینه استادانې روزلي او د یاد انسټیټوټ کمپیوټر لب یې هم تجهیز کړی دی.

 نوموړي د ښځو بنسټ د راتلونکي کال د پروګرام په اړه هم خبرې وکړې او ويې ويل، چې دغه بنسټ د هوکړه لیک د مودې غځولو ته لېواله دى.

ښاغلي شهامت د ښځو بنسټ له مرستو مننه وکړه او د دې مرستو دوام یې ګټور وباله.

د تخنيکي او مسلکي زده کړو ادارې سرپرست وويل، چې دغه همغږي به دوام ولري او د لاسليک شوي هوکړه ليک د عملي کېدو د څرنګوالي په اړه به د راپور له اورېدو وروسته د کاري مودې د غځولو په اړه پرېکړه وشي.