د لغمان ولایت علیشنگ کرنې مسلکي لېسې او کرنې او مالدارۍ مدیریت ترمنځ هوکړه لیک لاسلیک شو
په لغمان ولایت کې د تخنیکي او مسلکي زده کړو ادارې مسؤلین وايي چې د یاد ولایت اړوند علیشنګ ولسوالۍ د کرنې مسلکي لېسې د یادې ولسوالۍ د کرنې او مالدارۍ مدیریت سره د ګډو همکاریو هوکړه لیک لاسلیک کړی دی.
د نوموړو په وینا، د دواړو بنسټونو ترمنځ د هوکړه لیک لاسلیک کولو موخه د همکاریو پیاوړتیا او همدارنګه د یادې لیسې زده کونکو ته د عملي فعالیتونو لپاره د فرصت برابرول دي.
د دې هوکړه لیک پر بنسټ، د علیشنګ کرنې مسلکي لېسې زده کونکي کولای شي د عملي زده کړو د ترلاسه کولو په موخه د هغې ولسوالۍ اړوند د کرنې مدیریت سره په اړیکه شي او په عملي بڼه د کرنې او مالدارۍ بیلابیل موضوعات زده کړي.
دا په داسې حال کې ده چې د تخنیکي او مسلکي زده کړو مرکزونو مسؤلین هڅه کوي ترڅو د خصوصي او دولتي ادارو سره د هوکړه لیکونو په لاسلیک کولو سره د زده کونکو لپاره غوره ښوونیز چاپیریال چمتو کړي.
