د تخنیکي او مسلکي زده کړو ادارې پلاوي په نیمروز ولایت کې د مجاهدینو له روزنیز پروګرام څخه لیدنه وکړه
د تخنيکي او مسلکي زده کړو ادارې د تخنيکي او مسلکي چارو مرستيال مولوي غلام سعيد احساس د یادې ادارې د يوه پلاوي په مشرۍ نيمروز ولايت ته سفر وکړ او ددې ولایت د تخنيکي او مسلکي زده کړو مرکزونو کې يې د مجاهدينو له روزنيز پروګرام څخه ليدنه وکړه.
نوموړي له مجاهدينو سره په ليدنه کې مجاهدینو ته څرګنده کړه چې « تخنیکي زده کړې د یو هیواد اساس دي او د هیواد د خودکفا کیدو او ځان بساینې لپاره باید تخنیکي زده کړو ته لا زیاته وده ورکړل شي. »
د هېواد بېلابېلو ولايتونو ته د تخنیکي او مسلکي زده کړو پلاوي د سفر موخه د ولايتونو د تخنيکي او مسلکي زده کړو مرکزونو ستونزو او ننګونو ته رسیدګي ویل شوې ده.
دا په داسې حال کې ده چې اوس مهال په ټول هېواد کې شاوخوا ۳۵ زره تنه مجاهدین د تخنیکي او مسلکي زده کړو په مرکزونو کې په زده کړو بوخت دي.
