د تخنیکي او مسلکي زده کړو ادارې مشر د جمهوريت انسټیټوت او کابل د کڼو عالي لېسې څخه لیدنه وکړه
د تخنیکي او مسلکي زده کړو ادارې مشر ښاغلی مفتی فضل الرحمن فاضل؛ په کابل کې د ښځو د ادارې او تجارت، جمهوریت انسټيټوټ او د کڼو له لېسې څخه ليدنه وکړه.
ښاغلي فاضل لومړی د جمهوریت له انستیټوټ څخه څارنه او د یاد انسټیټوټ له چارواکو سره یې خبرې وکړې.
د جمهوریت انسټیټوټ امر د تخنیکي او مسلکي زده کړو ادارې مشر ته د یاد انسټیټوټ په اړه بشپړ توضیحات ورکړل.
د جمهوريت انسټیټوټ امر په وینا په دغه انسټیټوټ کې له څلورم څخه تر څوارلسم ټولګي پورې ښځینه زده کوونکي زده کړې کوي.
دا مهال ددغه انسټيټوټ د ابتدائیه دورې زده کوونکو درسونه روان دي.
د تخنيکي او مسلکي زده کړو ادارې مشر وويل، چې د ښځینه ښوونځيو په پرانيستلو کار روان دى او ډېر ژر به بېرته پرانيستل شي.
نوموړي د انسټیټوټ د کارکوونکو او استادانو د معاشونو په اړه هم ډاډ ورکړ.
ورپسې د تخنيکي او مسلکي زده کړوادارې مشر د کڼو له لېسې څخه ليدنه او د یادې لېسې له تدريسې بهير څخه يې څارنه وکړه.
د کڼو مسلکي لېسې مسوولینو خپلې ستونزې د تخنیکي او مسلکي زده کړو ادارې له رئیس سره شریکې کړې او ښاغلي فاضل ډاډ ورکړ چې د کڼو لېسې د ستونزو هوارول یې لومړیتوب دی او دې مسئلې ته به په کلکه پاملرنه وشي.
د تخنيکي او مسلکي زده کړو ادارې رئيس هم د کڼو لېسې درسې موادو څخه ليدنه وکړه او ژمنه يې وکړه چې د لا زياتو اسانتياوو په برابرولو به کار وکړي.
