د تخنيکي او مسلکي زده کړو ادارې سرپرست د ړندو ليسې څخه ليدنه وکړه
د تخنيکي او مسلکي زده کړو ادارې سرپرست د دغه ادارې له روزنيزو مرکزونو څخه د خپل لومړي لیدنې په ترڅ کې په کابل کې د ړندو(نه لیدونکو) له مسلکي ليسې څخه ليدنه وکړه.
نوموړي د دې ليدنې پر مهال د یادې لېسې له ښوونکو او زده کوونکو سره خبرې وکړې او د هغوى ستونزې او وړانديزونه يې واورېدل.
د ړندو مسلکي لېسې مدیر عبدالکبیر صدیقي د دې لېسې ستونزې مطرح کړې او د بریل خط مطبعې د فعالېدو غوښتنه یې وکړه. د هغه په وينا، د ترانسپورت او ښوونکو کمښت د لېسې د زده کوونکو پر وړاندې بله ننګونه ده.
تخنيکي او مسلکي زده کړو ادارې سرپرست د ړندو د عالي ليسې له زده کوونکو سره په کتنه کې هغوى د هېواد د راتلونکي لپاره ګټور وبلل او ويې ويل: تاسو بايد نا هیلې نه شئ... خداى (ج) دې تاسو لوی نعمت (پوهه/علم) درکړی."
نوموړي ژمنه وکړه، چې د ټولو ښوونیزو مرکزونو او په ځانګړې توګه د ړندو لیسو ستونزو ته به هر څومره چې ممکنه وي پاملرنه وکړي.
د تخنيکي او مسلکي زده کړو ادارې سرپرست وويل، چې د وسايلو او اسانتياوو د برابرولو په موخه به له مرسته کوونکو سره هم خبرې وکړي.
