د تخنیکي او مسلکي زدهکړو په مرکزونو کې د اصلاحي او تربیوي پروګرامونو لړۍ دوام لري
د درې ورځنیو اصلاحي او تربیوي پروګرامونو په دوام کې، د فکري تنویر ادارې د تخنیکي او مسلکي زدهکړو ادارې د دعوت او ارشاد ریاست په همکارۍ، د افغان ټکنالوژۍ انستیتیوت د زدهکوونکو او کارکوونکو لپاره یوه اصلاحي او تربیوي ناسته جوړه کړه.
د دې ناستې موخه د زدهکوونکو او کارکوونکو د دیني پوهاوي پیاوړتیا، فکري او تربیوي اصلاح او د اسلامي پوهې او معرفت د کچې لوړول وو.
د دې پروګرام په دویمه ورځ مولوي فتحالله عزام د «ولې د فکري جګړې ښکار کېږو او د هغې د خلاصون لارې کومې دي؟» تر عنوان لاندې خبرې وکړې. نوموړي د فکري جګړې بېلابېل اړخونه تشریح کړل او د پوهاوي د کچې لوړولو، د دیني او فکري لیدلوري د پیاوړتیا او پر ځوان نسل د فکري جریانونو د اغېزمنېدو د لارو چارو د پېژندلو پر اړتیا یې ټینګار وکړ.
د پروګرام په درېیمه ورځ هم مولوي فتحالله عزام د محصلینو او زدهکوونکو د سالمې او اسلامي روزنې په اړه وینا وکړه او د یوه ښه، مسؤول او بااحساسه محصل ځانګړتیاوې یې بیان کړې.
نوموړي له ګډونوالو وغوښتل چې د تخنیکي او مسلکي علومو د زدهکړې ترڅنګ، دیني علومو ته هم پاملرنه وکړي، اسلامي اخلاق مراعات کړي، شرعي احکام رعایت کړي او د قرآن کریم او نبوي سنتو له لارښوونو څخه په خپل ورځني ژوند کې ګټه واخلي.
دا پروګرام د تخنیکي او مسلکي زدهکړو په مرکزونو کې د فکري تنویر ادارې د اصلاحي او تربیوي ناستو د لړۍ یوه برخه ده، چې د دیني او تربیوي پوهاوي د لوړولو او د زدهکوونکو او کارکوونکو د فکري، معنوي او اخلاقي ودې لپاره ترسره کېږي.
