د تخنیکي او مسلکي زده کړو ادارې لخوا په نورستان ولایت کې د کارموندنې مرکز پرانستل شو
په نورستان ولایت کې د تخنیکي او مسلکي زده کړو ادارې مسؤلینو د یاد ولایت د تخنیکي او مسلکي زده کړو فارغانو لپاره د کاري فرصتونو د چمتو کولو په موخه د کار موندنې او مشورې ورکولو مرکز جوړ کړ.
ددې مرکز په پرانیست غونډه کې د تخنیکي او مسلکي زده کړو ادارې د مرکزي هستې یو شمیر مسؤلینو او د نورستان ولایت مقاماتو هم ګډون درلود.
د مسؤلینو په وینا، په نورستان ولایت کې د کارموندنې دغه مرکز د تخنیکي او مسلکي زده کړو مرکزونو د فارغانو لپاره د کار بازار د ننوتلو او د هغوی لپاره د کاري فرصتونو رامینځته کولو په موخه جوړ شوی دی.
له بلې خوا، د تخنیکي او مسلکي زده کړو ادارې پلاوي، چې ددې مرکز په پرانیست غونډه کې یې ګډون درلود، د یو شمیر هغو محصلینو لپاره چې د فراغت په درشل کې موقعیت لري د کارموندنې او شغلي مشورې ورکولو سیمینار هم ترسره کړ.
