د تخنيکي او مسلکي زده کړو ادارې سرپرست: د فساد په وړاندې هيڅ ډول زغم د منلو وړ ندی
د تخنیکي او مسلکي زده کړو ادارې سرپرست الحاج مولوي غلام حیدر شهامت د یادې ادارې له کارکوونکو سره په یوه ناسته کې خبرې او اترې وکړې.
د پروګرام په پیل کې محترم مولوي شهامت د تخنیکي او مسلکي زده کړو ادارې د کارکوونکو د ارزونې، د امتیازاتو د ویش، تقررونو او د ستونزو د حل په ګډون په یو شمېر موضوعاتو په مفصله توګه خبرې وکړې.
نوموړي وویل، د کارمندانو ارزونه په یوې اداره کې یو له اړینو اصولو څخه دی او کارمندان باید د هغوی د وړتیا او لیاقت پر بنسټ ارتقا او پرمختګ وکړي.
له بلې خوا د تخنيکي او مسلکي زده کړو ادارې سرپرست زياته کړه، چې «په خپل ټول توان د ژمنو او مخلصو کارکوونکو څخه ملاتړ کوي».
دغه راز محترم مولوي غلام حیدر شهامت څرګنده کړه چې «رخصتي» د هر کارمند مسلم حق دی او له دې حق څخه باید د اړتیا په صورت کې استفاده وشي.
په دې ناسته کې د تخنيکي او مسلکي زده کړو ادارې سرپرست د کارمندانو د اندیښنې او د کاري مصئونیتونو په باب په څرګند ډول وويل، «چې د ژمنو او متخصصو کارکوونکو څخه ملاتړ کوي، خو د مفسدو او استفادجو کسانو پر وړاندې به جدي اقدام کوي».
د یاد پروګرام په بله برخه کې یو شمېر کارکوونکو خپلې ستونزې او وړاندیزونه په مستقیم ډول د تخنیکي او مسلکي زده کړو ادارې له مشرتابه سره شریک کړل.
په همدې حال کې د یادې ادارې د تخنيکي او مسلکي چارو مرستيال محترم مولوي غلام سعيد احساس او د يادې ادارې سرپرست الحاج مولوي غلام حيدر شهامت د کارکوونکو پوښتنو او وړانديزونو ته ځوابونه وويل.
د پروګرام په پای کې د تخنیکي او مسلکي زده کړو ادارې یو شمېر کارکوونکو ته ستاینلیکونه هم ورکړل شول.
