په بدخشان ولایت کې د مجاهدینو لپاره د ادارې او مدیریت د روزنې بهیر دوام لري
د بدخشان ولایت د تخنیکي او مسلکي زده کړو آمریت چارواکي یاد ولایت د بهارک ولسوالۍ په کثیرالرشتوي انسټيټيوټ کې د مجاهدینو لپاره د ادارې او مدیریت د روزنیز پروګرام د پیل خبر ورکوي.
د دغه پروګرام د افتتاحیې په مراسمو کې سیمه ییزو چارواکو او مشرانو هم حضور درلود.
په دې غونډه کې ويناوالو د مجاهدينو لپاره د زده کړو د زمينې په برابرولو کې د تخنيکي او مسلکي زده کړو د ادارې هلې ځلې وستايلې او زياته يې کړه چې له دې فرصت څخه بايد ډېره استفاده وشي.
دا په داسې حال کې ده چې مخکې هم بدخشان ولایت د مجاهدینو لپاره د بیلابیلو ښوونیزو پروګرامونو د ترسره کیدو شاهد دی.
د هغې طرحې پر بنسټ چې د تخنیکي او مسلکي زده کړو ادارې لخوا چمتو شوې او د ریاست الوزرا د مقام لخوا منظور شوې ده؛ د هیواد په هر ګوټ کې مجاهدین کولای شي د تعلیمي سویې له تثبیت وروسته د تخنیکي او مسلکي زده کړو په مرکزونو کې شامل شي.
